"غزلان فى غابة الذئاب "
ده مش عنوان مسلسل او فيلم
او مجرد عنوان كده وخلاص
لا ده عنوان لموقف حصل معايا انا وقربتى امبارح ..!
والموقف ده مينفعش نقول عليه غير " غزلان فى غابه الذئاب "
والموقف هو
اننا >> " انا وقريبتى "
خرجنا امبارح دخلنا السينما وكان اليوم جميل
وبعد السينما قولنا نروح للبيت مشى والمسافه مش كبيره
لان دخلنا الفيلم فى سينما روكسى واحنا ساكنين فى التجنيد
واللى شجعنا كمان ان الجو كااان جميــــل اوووى
المهم فعلا اتمشينا مسافه وكان كل شى على ما يرام
وبعدين ......!!
واحنا مشين فى أمان الله لقينا شبين واحد من نحيتى وواحد من ناحيه قربتى
ومشين بيعكسو رحت مسكتها ووقفت علشان يعنى هما يكملو لان كده مشين مع بعض تقريبا
راحو مشيو
واحنا كملنا مشى .....
لحد ما وصلنا تقريبا عند الميريلاند وابتدت المعاكسات تزيييييييد
طول ما احنا مشين نلاقى عربيات تهدى ...
ويقولولنا اتفضلو واللى يقول ايه ده ايه الجماال ده ...
واللى يقول والله قمر بجد مش بجملك يعنى
وحنا مشين مش عارفين ايه ده مزهولين اصلااا اول مره فى حياتى اتحط فى الموقف ده
كنت حسه انى مش بتمشى فى مصر الجديده لا فى شارع الهرم وكمان لابسه بدله رقص ...
المهم كل الكلام ده مش حطاه فى بالى اهو الكلام مش بفلوس وكمان طالما انا وثقه انى مش شكلى ملفت للنظر
يعنى مش لبسه حاجه قصيره ولا ديقه خلاص .. يبقى انا صح وهما اللى مش كويسين
المهم كل اللى بحكلكو عليه ده واحنا مشين وطبعاااااا مش بنرد على حد
وتقريبا وصلنا لحد صاله الجيم اللى قدام الميريلاند
ولقينا 3 شباب ركبين عربيه
وفضلو يعكسونا ...
راح وقفت قولتلها تعالى نعدى الناحيه التانيه
واحنا وقفين علشان نعدى لان العربيات فى المكان ده بتبقى سريعه مستنين ان نعرف نعدى
لقينا واحد من الشباب دول نزل من العربيه وجى نحيتنا قربتى قالتلى الحقى ده جى علينا هنعمل ايه
قولتلها طيب اسكتى مش تبصى
راح جه قالنا اتفضلو نوصلكم احنا قصدنا خدمه انسانيه رحت شديت قربتى وعدينا الناحيه التانيه
فضلو مشين برده بالعربيه واحنا مشين الناحيه التانيه
ومره واحده لقيناهم وقفو العربيه ونزلو هما الثلاثه انا بقى فى اللحظه دى قلبى ووووقع فى رجليه
تخيلت اللى حصل فى المهندسين للبنات اللى اعتدو عليهم الصبيان فى الشارع
رحت شديت قربتى بسرعه ووقفت اول تاكسى قدامى وركبت بسررعه
من غير حتى ما اقوله رايحين فين
كان كل اللى هممنى انى ابعد عن الشباب دول بأى طريقه بقى
وفعلا الحمد الله مشينا وهما كانو وقفين فى نص الشارع مش عارفين يعملو ايه اتفاجئو من اللى عملنا هما
كان تقريبا فكرين انهم هيجو علينا كده واحنا بقى هنفضل وقفين
وركبنا التاكسى وانا عماله ازعق ومستائه جدا من اللى حصل
واذ اوفاجأ بان واحد ماشى ورا التاكسى وقربتى بتقول ده واحنا جين نركب التاكسى
كان بيعاكس بس انا مش اخدت بالى خااالص لانى كنت خيفه من الشباب اللى نزلو من العربيه
وفضل ماشى ورانا لحد ما وصلنا البيت
بس سواق التاكسى ربنا يكرمه نزلنا عند البيت وقالنا ان الراجل ده كان فاكرنا بنتقل عليه
قولتله نتقل ايه بس يعنى للدرجه دى الناس مبقتش تعرف تفرق بين الكويس والوحش
وبعدين عمالين يقولو ان الشباب بيعاكس علشان البنات بتبقى لبسه وحش
طيب احنا دلوقتى ايه اللى لبسينه وحش علشان يعملو كده ...؟
والله لحد ما روحت وانا مصدومه من اللى حصل
معقول احنا وصلنا لحد كده ... من قلت الادب لا حول ولا قوة الا بالله العلى العظيم
وكمان ايه بقى لما روحت وبحكى لصحاباتى على الموقف
اللى تقول تلاقيقو كنتو مشين بتدلعو واللى يقول طيب هما عملو كده ليه
طيب انا هعرف منين اللى بيعاكس ده بيعاكس ليه
بس اللى اعرفه اننا ولا كنا مشين بندلع ولا كنا لبسين لبس ملفت
كنا زينا زى اى بنات محترمه مشين فى الشارع
واللى متاكده منه ان الغلط فى الشباب دول مش فينا احنا ....
وبتمنى اى شاب يقرى اللى حصل ده وهو كان من اللى بيعملة كده
قبل ما تعاكس اى بنت او تدايقها
افتكر ان نفس الموقف ممكن يحصل للاختك او لمامتك او لحببتك
او للاى واحده من الغالين عليك
